BLOGGER TEMPLATES AND TWITTER BACKGROUNDS »

الثلاثاء، 20 أبريل 2010

بخـــاف


بقيت بخاف امشى فى الشارع لوحدى ......

بقيت بخاف ابص فى عيون الناس .....

بقيت بخاف لما بسمع صوت حد وانا ماشيه فى الشارع ........

بقيت بخاف لما عين حد فيهم تبصلى ......

بقيت بخاف من النــــــــــــــــــــــاس .......

مبقتش بحس بالأمان ابـــــدا .......

خايــــفه من بكرة ....

خايـــــفة من بكرة ومن الدنيا .....

بخاف ...وخايفة.... خايفه اوووووووووووووى

الجمعة، 16 أبريل 2010

رغى وجايز يبقى بوست يعنى


يااااااااااااااااااااااااااااااااااااااااه

هو انا اتاخرت كتير اوى كده

فى كم بوستات مشوفتهاش بتاتاً

يلا ربنا يقوينى واشوفهم ان شاء الله

اولا وحشتونى كتير كتير

ثانيا اسفه على التاخير ده بس كنت فى حاله ملل كالعاده

بس حبيبت افضفض معاكم واتكلم ....هو انا مش عارفه هتكلم فى ايه ولا عن ايه اصلا بس اهو هتكلم واكيد الكلام هيجيب كلام وهيعملو بوست فى النهايه



انهارده وانا فى الكليه لعبنا لعبه الصراحه ولما اتسألت خلونى قولت كلام واعرف كلام مكنتش انا نفسى اعرفه عنى

خلونى استكشفت حاجات كتير اوى منى

قالولى انتى ليه شايفه النص الفاضى من الكوبايه ... ليه مش شايفه النص المليان....؟؟

متوقعتش السؤال بس خلانى وقفت شويه مع نفسى ...هو انا فعلا مش شايفه نص الكوبايه المليان؟؟

للدرجه دى انا كئيبه ؟؟...... بس انا مش كده هو اه انا كئيبه واختى بتقولى انى بدور على النكد فين واروحلو بس مش للدرجه دى يعنى

فى حاجات فعلا تستاهل انى اشوف للنص المليان واحمد ربنا انها حصلتى علشان كان ممكن تحصل عواقب كتير انا مش قدها بسبب الموضوع ده بس لما بشوف نص الكوبايه الفاضى بيبقى النص التانى مليان اه بس مليان هوا سراب يعنى

فى دقيقتين كنت فكرت فى كل ده واستنتجت حاجه انى فعلا كتير مش بشوف غير النص الفاضى وده لانى كئيبه فعلا

وبعدين سالونى سؤال كمان ايه فى حياتك عايزة تغيريه او نفسك تعمليه ومش قادرة.........

قولتلهم عايزة ابعد , عايزة ابقى فى مكان معرفش حد فيه ولا حد يعرفنى فيه..... عايزة ابدأ حياتى من جديد وانا اللى اختار عايزة فيها ايه ومش عايزة فيها ايه .....((هو صحيح اقدر....؟؟؟))


واحنا قاعدين انهارده برضو جت بنتين واتعرفو علينا وفضلو يتكلمو على المسجد الاقصى طبعا انا احترمتهم كتير واهتميت اسمع كلامهم بس ياعينى بقى قبل مايكملو كلامهم واحده صحبتى دخلت فيهم شمال وفضل تزعق وتقولهم انتو جايين تتكلمو عن الاقصى وعيزين تصلحو حال الدنيا طب مش اولى بقى تصلحو حال بلدكم الاول ... استفزنى كلامها والطريقه اللى بتتكلم بيها ولما جيت اوقفها قالت احنا بنتناقش هو انتى علشان تتناقشى يعنى تعلى صوتك وتخوفى البنات منك ... بس المشكله بقى لاقيت نص البنات اللى قاعدين معاها واننا المفروض نشوف حالنا اولى ونفوق لمصلحة بلدنا وان ازاى عايزين ندافع عن الاقصى واحنا مش عارفين ندافع عن حقوق بلدنا .....

هما حافظين مش فاهمين؟؟

ولا انا اللى العروبه وخدانى ؟؟

ولا هما صح وانا غلط؟؟؟

ها؟؟


ياااااااااااااه رغيت كتير اوى ده ايه الرغى الفظيع ده

اه صحيح انا اه النيكنيم بتاعى Sad Angel بس مش كئيبه اوى يعنى ودمى خفيف والله

ده لمعلوماتكم يعنى اصلى مش بحب حد يفتكر انى بت كشرة يعنى

بس هو جت فترة كنت مضايقه علطول فصحبتى اطلقت عليا هذا الاسم ومن هنا اصبحت كذلك

اه كمان يعنى وبما انى رخمة فقررت اعلن عن مدونتى القديمة مدونتى القديمة هى بســـ امل ــمة

واسمى الحقيقى بســمــة انــــور


بس كده خلاص

الأحد، 4 أبريل 2010

هل مازالت طفله ؟؟؟


تلك الفتاه الطفله تربعت على العروش ببرائتها...

داعبت الزمان بوداعتها .... احببت انا طفولتها النديه ....

احببت هذه الاميرة الشقيه ...قلبها طيب ,لاتعرف حقداً ولا غروراً , احبت اناس واحبت الحياه ....احبت ان تكون طفلة نقيه ....لا لم ترد فهى بطبيعتها كانت طفله نقيه بلا شائبه دنية

بإختصار كانت طفله بكل معانى اطفوله البريئه الفطريه..

وفجأة.......

اصبحت طفلتى فتاه انثويه

فتاة بدأت فى صراع مع الحياه .....صارعت آلامها , حاربت حزنها , وتناست شقائها.....

تفتحت اعين طفلتى على عالم لاتعرف له لوناً حقيقياً....أهو عالمها الوردى؟؟ ام انه عالم ملأنُ بالسواد؟؟

علمت من الدنيا اشكال وشكليات وتعاملت مع اشخاص وشخصيات وكادت تنجرف مع كل هذه التيارات .....

كادت تنسى طفولتها وبرائتها التى ميزت قلبها وعقلها ....كادت تنسى الطفولة التى رٌسمت بها فى اعين عشيرتها ووالتى هدت بها ذاتها.....

جرفها التيار........

ارادت صغيرتى او فتاتى ان تعيش فى تلك الدنيا لبنى فيها احلامها الورديه ..... ولكن,عيشتها الدنيا لهواها ولأغراضها البشريه .

اخشى على طفلتى ان تفقد احلامها وان تمحو برائتها ...

اهاب من يوم تندم فيه على انها كانت او حاولت ان تلبى طلبات تلك الفتاه الانثويه ....


فهل مازالت طفلة ؟؟؟

الخميس، 1 أبريل 2010

هكذا دائما "كلمات مبعثرة"


دائما ما تعثرت خطى قلبها ... دائما ما اصاب قلبها الألم....

ولكن دائما ما كانت اقوى بكثير من ألمها , فهى لم تسمح ابدا لجرح ان يحطمها بل ان استطاعت هى فستحطمه ....

كلما تعثرت استقامت من جديد لتبدء من جديد تاركة الماضى خلفها ....

فيشعر قلبها آنذاك بانتصاره على ألمه ...

وياله من شعور حين تستطيع التغلب على الماضى وعلى الزمن ....

دائما توقن انها ستجد تعويض يرضيها عن ما حدث لها ....

دائما تأمل فى الافضل.....

ولكن دائما ما تعثرت خطاها ودائما ما حطمتها الاقدار ....

فياستار من مستقبل خلف الانظار

السبت، 20 مارس 2010

اقبلونى بينكم


بسم الله الرحمن الرحيم

اعزائى الزوار ...

هل من الممكن ان تقبلونى بينكم؟؟

دى مش اول مرة اعمل مدونة ومش التانيه كمان .....

فى حاجه بتربطنى بالعلم ده مش عارفه ايه هى ....

بس بشوفو مكان مريح بقدر اطلع فيه اللى جوايا من غير مااكون مضطربه ولا قلقانة من حاجه

مقدرش احكم ان تجربتى مع التدوين فشلت ....

لكن انا اللى سبتها وتخليت عنها لاسباب نفسيه منعتنى اكمل...

بس مع الوقت اكتشفت ان التدوين علاجى

علشان كده ياريت تقبلونى بينكم من جديد.....


واللى هيعرف مدونتى القديمة ليه هديه عندى (: ......اكيد مع الوقت اللى كانو يعرفونى عن قرب هيعرفون مدونتى القديمة ..... ساعتها هعرف كان ميم مهتم يتابعنى ومين لا هههههههههه


انتظرونى فى حلتى الجديده اعزائى ....